Компани хөрөнгийн зах зээлд гарч, олон нийтээс амжилттай санхүүжилт татах эсэх нь эцсийн дүндээ хөрөнгө оруулагчдын шийдвэрээс шууд хамаардаг. Тэд танай компанийн үйл ажиллагааг хэрхэн үнэлж, ирээдүйд хэрхэн итгэж байгаагаас хамаарч хувьцааны үнэ цэнэ тодорхойлогдоно. Тийм ч учраас компаниуд IPO хийх үйл явцаа потенциал институциональ хөрөнгө оруулагчдын нүдээр харах нь нэн чухал байдаг.
Эдгээр институциональ хөрөнгө оруулагчдад бидний өмнө нь дэлгэрэнгүй ярилцсан Хамтын сангууд (ХОС), Хедж сангууд, Банкууд, Даатгалын компаниуд, Тэтгэврийн сангууд болон корпорацийн салбарын бусад санхүүгийн зуучлагчид багтдаг.
Институциональ хөрөнгө оруулагчдад юу хамгийн чухал вэ?
Хөрөнгийн зах зээлийн туршлагаас харахад, томоохон хөрөнгө оруулагчдын хувьд тухайн компанийн IPO-д оролцох (хувьцааг нь худалдан авах) эсэхээ шийдэхэд дараах 5 хүчин зүйл хамгийн чухал нөлөө үзүүлдэг байна:
-
Хүчирхэг удирдлагын баг: Хөрөнгө оруулагчид зөвхөн бизнес моделд бус, түүнийг хэрэгжүүлэх багт мөнгөө даатгадаг тул гүйцэтгэх удирдлагын ур чадвар, туршлага, тогтвортой байдал хамгийн чухалд тооцогдоно.
-
Үнэмшилтэй хөрөнгө оруулалтын түүх (Investment story): Компанийн өсөлтийн потенциал, өрсөлдөх давуу тал, зах зээлд эзлэх байр суурь болон татсан хөрөнгөөрөө хэрхэн үнэ цэнэ бүтээх тухай маш тодорхой, сонирхол татахуйц, бодитой алсын хараа шаардлагатай.
-
Үнийн бодит бөгөөд шударга тогтоолт (Fair pricing): Хувьцааны анхдагч үнэлгээг хэт хөөрөгдөхгүйгээр, зах зээлийн бодит нөхцөл байдалд нийцсэн, цаашид өсөх боломжтой (хөрөнгө оруулагчдад өгөөжөө өгөхүйц) шударгаар тогтоох нь амжилтын үндэс болдог.
-
Цаг үеэ зөв мэдрэх (Market timing): Макро эдийн засгийн нөхцөл байдал, салбарын чиг хандлага болон хөрөнгийн зах зээлийн мөчлөгийг зөв тодорхойлж, хөрөнгө оруулагчдын худалдан авах сонирхол өндөр байгаа зөв цаг мөчийг сонгож гарах.
-
Хөрөнгийн зах зээлийн шаардлагад бүрэн нийцсэн бэлтгэлтэй байдал: Компанийн засаглал, санхүүгийн ил тод байдал, тайлагнал зэрэг нь хөрөнгийн биржийн хууль эрх зүйн хатуу шаардлагууд болон мэргэжлийн хөрөнгө оруулагчдын өндөр хүлээлтийг бүрэн хангасан байх.